तूं तरी खंय जाणा???

तुज्या बॉय कट केल्ल्या कोंगरे केसांत
भोंवडायता जेन्ना तूं हात
म्हजे काळजाचो जाता गो घात,
तेच खीणाक...

तूं लावन फाटीक बॅग
मारत उडयो, धांवता हांगा थंय
नदर म्हजीय मारता उडयो
खीणा खीणाक...

लावन मोबायल कानाक
व्हडल्यान घालता जेन्ना तू धेंगशे
तुजो धांक करता पिसो
म्हज्या मनाक...

उमेदीन जावन खोशी
व्हडल्यान आड्डता तूं तेन्ना,
दिसता धरचे घट्ट वेंगेत,
तेच खीणाक...

तुका ना शिंगाराची आस्त
ना सुंदर दीसपाचो सोंस
पूण सुंदरकाय तुजी ह्याच बिनधास्तपणांत
हे तूं तरी खंय जाणा???