अचकीत

"आयज अचकीत जर

तो आयलो सामकार

आनी

तुज्या दोळ्यांत दोळे घालून

ताणे म्हणलें

'आयज तुज्या भीतर

स्वताक विसरन दिसता'

जाल्यार किते करतलें?"

त्या पांवशी थंड रातींत

ताणे वेंगेत घेत विचारलो हो प्रस्न

आपले बायलेक

तिच्या पयल्या मोग्या विशीं...

"आखांताच्या मोडांत

जर व्हांवन वचपाचेंच आसा,

बेधूंद नशेंत

बेभान जावपाचेंच आसा

जाल्यार तेच खिणाक

रिगतले ताचे भितर

मोग कितें तो ताणेच तर शिकयल्लो"

तिणे जाप दिली,

ताची वेंग आनीक

घट्ट करतना...

ती दोगांय हांसलीं,

आखांताचे मोड तेन्नाच आयलें,

बेधूंद चिप्प भिजोवन गेलें...